އަރިއަތޮޅު އުތުރުބުރީ މަތިވެރީގައި ދިވެހި ސަރުކާރާއި މަތިވެރީ ރައްޔިތުން ގުޅިގެން ޤާއިމު ކުރައްވާފައިވާ މަތިވެރީ ސްކޫލަކީ ދިވެހި ސަރުކާރުގެ ބަޖެޓުން ޚަރަދު ކުރައްވައިގެން ހިންގަވަމުން ގެންދަވާ ސްކޫލެކެވެ. މި ސްކޫލް އއ. މަތިވެރީގައި ޤާއިމްކުރައްވައި، މިނިސްޓްރީ އޮފް އެޑިއުކޭޝަނުން ހިންގަވަމުން ގެންދަވަނީ މިރަށުންނާއި، އެހެން ރަށްރަށުން ވިޔަސް މިސްކޫލަށް ތަޢުލީމް ޙާޞިލްކުރުމަށް ބޭނުންވެގެން އަންނަ ކޮންމެ ދަރިވަރަކަށް ފަށާ ތަޢުލީމާއި، ޘާނަވީ ތަޢުލީމް އުގެނުމުގެ ފުރުޞަތު ފަހިކޮށް ދިނުމަށެވެ.

އއ. މަތިވެރި މަދަރުސާގެ ނަމުގައި ހިންގަވަމުންއައި މި މަދަރުސާގެ ނަން މަތިވެރި ސްކޫލަށް ބަދަލުވެފައިވަނީ 2001 ވަނަ އަހަރުގައެވެ. މަތިވެރި މަދަރުސާގެ ނަމުން މަތިވެރި ސްކޫލަށް ބަދަލުވުމަށްފަހު ފަށާ ތަޢުލީމުގެ ފެންވަރަށް ކިޔަވައިދެމުން އައިސް 2006 ވަނަ އަހަރު ކޮމާސް ސްޓްރީމުން ޘާނަވީ ތަޢުލީމް ތަޢާރަފް ކުރެވުނެވެ. މިގޮތުން މަތީ ޘާނަވީ ތަޢުލީމް ފުޅާކުރެވި 2008 ވަނަ އަހަރުން ފެށިގެން މި ސްކޫލް ވަނީ ޘާނަވީ ތަޢުލީމް ނިންމާ އިމްތިޙާނުތައް ބާއްވާ ސްކޫލެއްގެ ގޮތުގައި ހަމަޖައްސަވާފައެވެ. 2013 ވަނަ އަހަރު ސްކޫލުގެ ސާނަވީ ދަރިވަރުންނަށް ކޮމްބައިން ސްޓްރީމް ވަނީ ތަޢާރަފް ކުރެވިފައެވެ. އަދި 2015 ވަނަ އަހަރުން ފެށިގެން އައު މަންހަޖަށް ސްކޫލްގެ ދަރިވަރުންނަށް ކިޔަވައިދޭން ފެށުނެވެ. އޭގެ ފަހުން 2017 ވަނަ އަހަރު ސްކޫލުގައި ބީޑެކް ސްޓްރީމް ތަޢާރަފް ކުރެވިފައިވެއެވެ.